BANSANGU YA KIZUNGA. (7-10 MAI 2010)

1.
NZIBUDULU YA BA INZO YA IMPA YA BISALU YA D.G.M. BAS-CONGO

Nsuka ya sabala meluta salamaka na Kizunga ya Bas Congo nkinzi ya nzibudulu ya ba Inzo ya bisalu ya Direction Générale ya Migration na bunkufi « D.G.M. » na lutuadusu ya Vice Premier Ministre, Ministre ya Interieur pe ya Securité Mbuta Adolphe LUMANU BUANA SEFU yai nkinzi salamaka na meso mbangi ya Mfumu a Kizunga Mbuta Simon Floribert MBATSHI BATSHIA, ya Conseiller Principal ya Mfumu a Insi ketalaka mambu ya ntungulu, ya Ntumua ya Insi ya Grande Bretagne na Insi a beto buela diaka Président ya Inzo-a-Kinzonzi ya Kizunga ya B.C. pe ba Senateurs na ba Deputés Nationaux pe Provinciaux.-

Ba Inzo ya bisalu yai zibuluaka ya vuandaka ya Frontière ya Yema-di-Ngoyo mebakama na Territoire ya MUANDA yai mekabula Kizunga ya beto na Kizunga ya CABINDA ya Insi ya ANGOLA, na Mbanza MATADI pe na Frontière ya Lufu mebakama na Territoire ya SONGOLOLO yai mekabula Kizunga ya beto na Kizunga ya DO ZAIRE kaka ya Insi ya ANGOLA.-

Lusadusu ya mbongo ya ntungulu ya ba Inzo ya bisalu nionso yai katukaka na Royaume Uni pe kimvuka ya Organisation Internationale ya Migration na bunkufi « O.I.M. » sika batudilaka bau diaka bisadulu ya impa samu na kupesa bisadi ya D.G.M. diluaku yakusala bisalu ya bau na mutindu ya mbote lokola yakena kusalamena na nganda paka paka to Aéroport ya Ndjili na Kinshasa pe na Poste ya KASUMBALESA na Kizunga ya KATANGA.-

Na yau Ntumua ya Insi ya Grande Bretagne na Insi-a-beto Mbuta Neil WIGAN na Directeur Général a.i. ya D.G.M. Mbuta François BEYA pe monikisi ya O.I.M. Professeur KAWAYA bayangalalaka mingi na kumona lukanu ya bau melungana.-

Nzokande na ndambu ya Mbuta Adolphe LUMANU yandi siamisaka mingi ban golo yai mesalama na ba Mbuta ya Kizunga samu na ntungulu ya ba Inzo ya bisalu yai pamba ve yame kotisa kizizi ya nkaka ya impa na Kizunga ya B.C., yai Kizunga kena intu ya Mbuta Simon Floribert MBATSHI BATSHIA meyangalala nakumona mabanza nandi melungana.

2.
MFUTULU YA BA MFUMU YA MAPALATA YA TERRITOIRE YA MUANDA NA LUYALU YA KIZUNGA.-

Nzietolo ya kisalu ya Vice Premier Ministre, Ministre ya Interieur pe Securité na Kizunga ya B.C. samu na nkinzi ya nzibudulu ya Inzo ya bisalu ya D.G.M. na Territoire ya MUANDA pesaka diluaku na Mfumu –a- Kizunga na kufuta ba Mfumu ya Mapalata ya Territoire yina mbongo ya bau ya nsuka ngonda yai vuandaka ya nfuka ya ngonda IYA to quatre mois na ntalu ya 1OO.000 FC yai metadila JANVIER, FEVRIER,MARS pe AVRIL yai mbongo luyalu ya zulu to Gouvernement Central kena kiyekua ya kufuta bau.-

Yake mutindu yina ba Mfumu ya Mapalata makumi tatu na zole to 32 Chefs de Groupements bakaka mbongo yina na maboko ya Vice Premier Ministre yai mepesa ntalu ya 3.2OO.OOO FC ( FRANS CONGOLAIS TROIS MILLIONS DEUX CENT MILLE ) yai mbongo tomaka lundua na Administrateur ya Territoire ya MUANDA yai yandi vuandaka zabila nsasa ve kubanda batindilakandi yau wapi sika Mfumu –a- Kizunga siamisaka nkadilu ya mbote Tata Administrateur ya Territoire monisaka na kukondua kusueka mbongo yina.

Samu na yau nfutulu ya ba Mfumu ya Mapalata ya Territoire ya MUANDA na luyalu ya Kizunga pesaka diaka diluaku na Mfumu ya Kizunga Mbuta Simon Floribert MBATSHI BATSHIA na kulomba na VICE Premier Ministre, Ministre ya Interieur pe Securité na kuzabisa na luyalu ya zulu nakubaka kiyekua ya bau yakufuta ba Mfumu ya Mapalata mbongo yabau mutindu yasonamenaka na mukanda ya ba nsiku ya Insi-a- beto to CONSTITUTION pamba ve yake mosi ya diambu kesiamisa kimfumu ya bau.

Na yau Mbuta Adolphe LUMANU pesaka nsilu na Mfumu ya Kizunga nakunata ba mambu yai na bakundi nandi ya luyalu ya zulu samu na kupesa mvutu yakufun na ba Mfumu ya Mapalata bayai ke ba monikisi ya kinkulu metadila Insi-a- beto.-

Julienne NTIMA BOSENGE